შემოგვიერთდით

,,სწორად შერჩეული ადამიანური რესურსი წარმატების გასაღებია” – ნიკოლოზ კვარაცხელია Feedc-ის დამფუძნებელი

Feedc არის ადგილმდებარეობაზე დაფუძნებული პლატფორმა, რომელიც ხალხს მსოფლიოს მასშტაბით ინფორმაციის გაცვლის თანაბარ შესაძლებლობას აძლევს. ჩვენ გაგაცნობთ მის დამფუძნებელს ნიკოლოზ კვარაცხელიას. ის Skema Business School-ში გლობალ მენეჯმენტის განხრით სწავლობს. ამბობს, რომ ზუსტად სწავლის დროს გაუჩნდა Feedc-ის შექმნის იდეა და გადაწყვიტა აქტიურად დაეწყო ამაზე მუშაობა.

HR hub: ნიკოლოზ საიდან გაგიჩნდა Feedc-ის შექმნის იდეა?

პლატფორმის შექმნის იდეა დამებადა უცხოეთში ცხოვრების დროს, როდესაც საფრანგეთში სასწავლებლად ჩავედი. მივხვდი, რომ არ მქონდა წვდომა იქაურ ინფორმაციაზე. ჩემი სოციალური ქსელების ფიდები სავსე იყო უკვე არსებული მეგობრების პოსტებით, რომლებიც საქართველოში ცხოვრობდნენ და შესაბამისად, საქართველოზე წერდნენ. მე კი მჭირდებოდა მცოდნოდა ყველაფერი, რაც ხდებოდა ჩემს გარშემო – საფრანგეთში.

მიუხედავად იმისა, რომ არსებობს ბევრი ტიპის სოციალური ქსელი და პლატფორმა, ძალიან რთულია გაიგო რა ხდება კონკრეტულად იქ, სადაც იმყოფები იმიტომ, რომ ყველა ამ პლატფორმის ფიდი დაფუძნებულია მეგობრებისა და გამომწერების პოსტებზე. შესაბამისად, იქმნება რაღაც წრე, რომელშიც მუდამ ვტრიალებთ და რომელიც მოგვყვება სადაც არ უნდა წავიდეთ. პრობლემა იმაში მდგომარეობს, რომ ეს წრე გარკვეულწილად ზღუდავს ინფორმაციის მიმოსვლას და ქმნის სოციალურ ვაკუუმს.

ზუსტად ამ პრობლემაში დავინახე გამოსავალი, რომ შემექმნა ისეთი პლატფორმა, რომელიც ხალხს მიაწვდიდა რეალურ დროსა და ლოკაციაზე დაფუძნებულ ინფორმაციას – და ასე გაჩნდა Feedc-ი.

HR hub: ერთია იდეის მოფიქრება და მეორე განხორციელება. როგორ შეძელით თქვენი იდეისთვის ფრთების შესხმა?

როდესაც Feedc-ის შექმნის იდეა პირველად გამიჩნდა, ბევრს ვფიქრობდი რა ნაბიჯების გადადგმა იყო საჭირო იმისთვის, რომ ხარისხიანი და საინტერესო პროდუქტი შემექმნა. საბედნიეროდ, ჩემმა უნივერსიტეტმა მომცა იმის საშუალება, რომ ხშირი და ახლო კონტაქტი მქონოდა პროფესორებთან ბიზნესის ყველა სფეროში. მათი რჩევებითა და დაკვალიანებით მომეცა საშუალება, აბსტრაქტული იდეა სრულყოფილ სტრატეგიად მექცია. როდესაც მივაღწიე იმ ეტაპს, რომ ჩემი გეგმით კმაყოფილი ვიყავი, დავიწყე გუნდის შეკრება, რათა იდეა სისრულეში მომეყვანა. მიზნად დავისახე შემეკრიბა მოტივირებული ინოვატორების გუნდი, რომლებსაც ამ იდეის ჩემსავით სწამდათ. მივიჩნევ, რომ სწორად შერჩეული ადამიანური რესურსი წარმატების გასაღებია.

HR hub: გუნდის შესახებ რას გვეტყვით, რამდენი ადამიანი მუშაობს დღეს Feedc-ის განვითარებაზე?

დღეს Feedc-ს უკვე 50-ზე მეტი თანამშრომელი ჰყავს. ჩვენი გუნდი შედგება უმაღლესი კვალიფიკაციების მქონე პროფესიონალებისგან, რომლებიც Feedc-ში მოსვლამდე მუშაობდნენ დიდ კორპორაციებში, როგორებიც არის Microsoft, Apple, TBC Bank და Bank of Georgia.

ჩვენი სათავო ოფისი დაფუძნებულია თბილისში, სადაც მუშაობს ჩვენი დიზაინის გუნდი და დეველოპმენტის გუნდის დიდი ნაწილი. გარდა ამისა, ოფისი გვაქვს უკრაინაშიც, საიდანაც ჩვენი თანამშრომლების მეორე ნაწილი მართავს ოპერაციებს.

HR hub: ვისთვის არის განკუთვნილი ეს სოციალური ქსელი?

პირველ რიგში Feedc არის ლოკაციაზე დაფუძნებული მედია პლატფორმა. მინდა ამას განსაკუთრებით გავუსვა ხაზი, რადგან ბევრი სოციალურ ქსელად მიიჩნევს. განკუთვნილი კი არის ყველასთვის ვინც დაინტერესებულია რა ხდება იქ, სადაც იმყოფება. მაგალითად, მე თუ ვიმყოფები თბილისში და მაინტერესებს რა ხდება ჩემ გარშემო თუნდაც კონკრეტულ ქუჩაზე, Feedc-ი მაძლევს საშუალებას ყველაზე სწრაფად და მარტივად მოვიძიო საჭირო ინფორმაცია. ანალოგიურად, მსოფლიოს ნებისმიერი წერტილიდან, Feedc-ის მეშვეობით შემიძლია პასუხი გავცე კითხვას: „რა ხდება ჩემ გარშემო?“

HR hub: რა განაპირობებს პოსტის ნახვების რაოდენობას?

პოსტზე ნახვები თავიდან ბოლომდე დამოკიდებულია პოსტის ხარისხსა და შინაარსზე. ძალიან მნიშვნელოვანია, რომ პოსტი იყოს კონცეპტუალურად საინტერესო გარშემო მყოფი ხალხისთვის. პლატფორმის მთავარი არსი და მიზანი არის ის, რომ ხალხს მისცეს აზრის თანაბრად გამოხატვის და პოზიციის დაფიქსირების შესაძლებლობა და არ იყოს გამომწერების რაოდენობაზე დაფუძნებული.

HR hub: რამდენად საინტერესოა ბიზნეს კომპანიებისთვის ფიდსის გამოყენება და ზოგადად, კორპორატიულ სეგმენტზე თუ მუშაობთ?

კორპორატიულ სეგმენტზე ცალკე გუნდის ჩამოყალიბება ახლა დავიწყეთ. ეს გუნდი მუშაობს ბიზნესებისთვის სხვადასხვა საინტერესო პროდუქტის შექმნაზე. სარეკლამო ბიზნესები მისცემს ხალხს საშუალებას Feedc-ზე განათავსონ სხვადასხვა ტიპის რეკლამა.

ყველაზე უნიკალური შესაძლებლობა, რომელსაც Feedc-ი ბიზნესებს თავაზობს არის ლოკალური თარგეთინგი. თუ კონკრეტულ კომპანიას სურს რომ კონკრეტულ ადგილზე მცხოვრებ ხალხს ხმა მიაწვდინოს, Feedc-ი არის იდეალური პლატფორმა ამისთვის.

HR hub: მომავალში რა გეგმები გაქვთ?

ჩვენი მომხმარებლების რაოდენობა თანდათან იზრდება როგორც ქვეყნის შიგნით, ასევე საზღვარგარეთ და ზუსტად იმ ქვეყნების ბაზარზე ვაპირებთ გასვლას, საიდანაც ძალიან დიდი ინტერესია ჩვენი პროდუქტის მიმართ.

იმის გათვალისწინებით, რომ არანაირი რესურსი არ დაგვიხარჯავს სხვა ქვეყნებიდან მომხმარებლის მოზიდვაზე, ამის ფონზე ძალიან კარგი შედეგი გვაქვს. ჩვენ გვინდა, რომ ამაში უფრო მეტი რესურსი ჩავდოთ და განვვითარდეთ ამ მიმართულებით. ეს არის ჩვენი მთავარი სამომავლო გეგმა.

რა უნდა ვიცოდეთ მამების დეკრეტული შვებულების შესახებ?!

ალბათ ერთხელ მაინც მოგიკრავთ ყური მამების დეკრეტული შვებულების შესახებ. Continue reading “რა უნდა ვიცოდეთ მამების დეკრეტული შვებულების შესახებ?!”

ტყუპების მიერ წამოწყებული ბიზნესი

სულ რამდენიმე თვეა რაც Medellin Bar-მა ძველ თბილისში დაიდო ბინა. მისი დამფუძნებლები ტყუპები თორნიკე და გიორგი ჭიჭინაძეები არიან. ბარში ამ ეტაპზე 4 ადამიანია დასაქმებული. სამწუხაროდ ბარის გახსნიდან რამდენიმე ხანში კარანტინი გამოცხადდა. გთავაზობთ ინტერვიუს ბარის ახალგაზრდა მფლობელებთან.

HR hub: თონრიკე მოგვიყევით ,,მედელინამდე“ რას საქმიანობდით?

2017 წელს დავამთავრეთ კავკასიის უნივერსიტეტი, სწავლის დამთავრების შემდეგ, მუშაობა დავიწყეთ – მე, უზენაესი სასამართლოს ანალიტიკურ განყოფილებაში უფროსი სპეციალისტის თანამდებობაზე და დღემდე ვმუშაობ, ხოლო ჩემმა ძმამ გიორგიმ Hard Rock Café Tbilisi – ის შესყიდვების მენეჯერად, რომელიც ამავე დროს არის ფინანსური მომსახურების კომპანია „დილიჯენსის„ თანადამფუძვნებელი..

HR hub: საიდან გაჩნდა ,,მედელინ ბარის“ გახსნის იდეა?

ზოგადად ბარის გახსნის იდეა ადრეული, სტუდენტური ასაკიდან გაჩნდა და ამის შემდეგ მუდმივად გვქონდა სურვილი ამ კუთხით რაიმეს გაკეთების, თუმცა იყო სხვადასხვა ფაქტორი, რის გამოც ამას ვერ ვახერხებდით. უშუალოდ მედელინს რაც შეეხება, ეს იდეა გიორგის ეკუთვნის. იმდენად ბევრი გვქონდა ამ საკითხზე ნაფიქრი, რომ იდეის გაჩენიდან ძალიან სწრაფადვე მე, ჩემმა ძმამ და ჩვენმა მეგობარმა, მოვაგვარეთ საორგანიზაციო საკითხები და სულ რამოდენიმე კვირაში გავხსენით ბარი.

HR hub: ძმებს როგორ გაქვთ ფუნქციები გადანაწილებული?

ბარის მენეჯმენტში ორივე აქტიურად ვართ ჩართული. თუმცა გვაქვს განსხვავებული ფუნქციები და პასუხისმგებლობები. გიორგი ბარის ფინანსურ ნაწილს და შესყიდვებს კურირებს, ხოლო მე მარკეტინგული საკითხებით ვარ დაკავებული..

HR hub: რამდენად ეთანხმებით ერთამანეთის იდეებს?

ვფიქრობთ, არ არსებობს ორი ადამიანი, თუნდაც ტყუპები, რომლებსაც ერთ კონკრეტულ საკითხზე აბსოლუტურად იდენტური შეხედულება და აზრი გააჩნიათ, რა თქმა უნდა ჩვენც გვაქვს განსხვავებული მოსაზრებები სხვადასხვა საკითხებთან დაკავშირებით, თუმცა ბარის ინტერესებიდან გამომდინარე, მუდმივად ვცდილობთ ერთმანეთის საუკეთესო იდეების შეჯერებასა და მათ განხორციელებას.

HR hub: რით არის გამორჩეული ეს ადგილი?

ბარი მედელინი მდებარეობს ძველი თბილისის პირდაპირ ცენტრში (სოლოლაკი, ბეთლემის აღმართი #2), სადაც უამრავი კულტურული მემკვიდრეობის შენობა-ნაგებობების და ულამაზესი ხედების ფონზე, ჩვენი ბარის გემოვნებიანი მუსიკის ჰანგები ჟღერს, რაც ამ ადგილს ერთიორად მიმზიდველსა და საინტერესოს ხდის. რაც შეეხება თვითონ ბარის კონცეფციას, ვცდილობთ, რომ საინტერესო ინტერიერის, უგემრიელესი კერძებისა და სასმელების, უამრავი გასართობი საშუალების (სამაგიდო თამაშების, კარგი მუსიკის და სხვა ბევრი საინტერესო აქტივობის), მისაღები ფასებისა და პოზიტიური პერსონალის მეშვეობით, ტიპიური კარგი ბარის ფუნდამენტიც არ დავკარგოთ და რაღაც განსხვავებული – ახალიც შევთავაზოთ ჩვენ მომხმარებელს. ერთი სიტყვით ეს არის იდეალური ადგილი განტვირთვის, ურთიერთობებისა და გართობისთვის.

HR hub: ბიზნესის კუთხით რა გასწავლათ კორონავირუსმა?

ბიზნესში არსებობს სიტუაციები, როდესაც შეიძლება არაპროგნოზირებადი გარემო ფაქტორების გამო, რადიკალურად განსხვავებულ რეალობაში აღმოჩნდე, სადაც ბაზარზე პოზიციონირებისთვის არასტანდარტული მეთოდების განსაზღვრაა აუცილებელი. ამიტომ მნიშვნელოვანია გვქონდეს მკაფიოდ გამოკვეთილი მიზანი, რაც საშუალებას მოგვცემს არსებულ სიტუაციაზე მოსარგებად შევიმუშაოთ გეგმა -B და გეგმა C-ც თუ საჭირო გახდა, რომელიც თავის მხრივ საწყის ეტაპზე დაგეგმილი უკუგების მიღებას უზრუნველყოფს.

ქალი მეწარმე ტექნოლოგიების სფეროში – პანდემია და ახალი გამოწვევები

შპს “ლინტონ გრუფი” 2019 წლის ივლისში დაარსდა. თუმცა, ბაზარზე პოსტ-პანდემიური პერიოდიდან გამოჩნდა აქტიურად და აღსანიშნავია, რომ კომპანიამ პროდუქტის გაშვებიდან ძალიან მცირე დროში მოიპოვა სანდოობა და შესაბამის სფეროში ძალიან კომპეტენტური ადამიანების მხარდაჭერა და თანადგომა.

ჩვენ ვესაუბრეთ კომპანიის ერთ-ერთ დამფუძნებელს ნანი კობახიძეს და მათი საქმიანობის შესახებ დეტალური ინფორმაცია მივიღეთ.

HR hub: მოგვიყევით ,,ლინტონ გრუფის“ საქმიანობის შესახებ.

Linton Group-ის მიზანია შევქმნათ და ორგანიზაციებს მივაწოდოთ სხვადასხვა სერვისის სახით პრემიუმ კლასის თანამედროვე, მომხმარებელზე ორიენტირებული ადამიანური კაპიტალის მართვის სისტემები.
ჩვენი პროდუქტები რეალურ შესაძლებლობას მისცემს ორგანიზაციებს უფრო ეფექტური გახადონ შიდა ბიზნეს პროცესების მართვა, მყისიერად მიიღონ დამუშავებული სტატისტიკური ინფორმაცია და ანგარიშები, აკონტროლონ შრომის კანონმდებლობით განსაზღვრული ვადები, გააუმჯობესონ შიდა კომუნიკაციის პროცესი და აქციონ ის სტრატეგიულ პრიორიტეტად, გამოიყენონ მრავალი არხი ინფორმაციის და შესაბამისი დოკუმენტაციის გასაზიარებლად, მოქნილად და ეფექტურად მართონ თანამშრომელთა შერჩევის პროცესი და შესაბამისი ეტაპები, დაამყარონ კანდიდატებთან უკუკავშირი, აწარმოონ შიდა ორგანიზაციული კვლევები და გამოკითხვები, შეაფასონ და წაახალისონ თანამშრომლები, ეფექტურად წარმართონ თანამშრომელთა განვითარების და ტრენინგების პოლიტიკა.

HR hub: რა პროდუქტს სთავაზობთ მომხმარებელს?

ამ ეტაპზე კომპანიებს და მათ HR-ებს ვთავაზობთ ტალანტების შერჩევის პროგრამას (LRS), რომელიც არის უნიკალური გადაწყვეტა კომპანიის თანამშრომელთა შერჩევის ბიზნეს პროცესების სამართავად ნებისმიერ ეტაპზე (დაწყებული ვაკანსიის გამოცხადებიდან – დამთავრებული თანამშრომლის დაქირავებამდე) და უზრუნველყოფს ზუსტ ანალიტიკას. ორგანიზაციებისთვის ტალანტების შერჩევის პროცესი ძვირადღირებული, დროში გაწელილი და შრომატევადი პროცედურაა. რეზიუმეების ერთიანი ბაზის წარმოება, ავტომატური დახარისხება, შეფასება სხვადასხვა კრიტერიუმებით, ფილტრაცია ნებისმიერი მონაცემით, პროფესიული კითხვარები – ყველა ეს შესაძლებლობა თავიდან აგარიდებთ ყოველდღიურ რუტინულ ფურცლომანიას და შეუფასებელ დახმარებას გაგიწევთ სწორი კანდიდატის შერჩევის პროცესში. თქვენ გექნებათ სრული ინფორმაცია, რომელი აპლიკანტი შერჩევის პროცესის რა ეტაპზე იმყოფება. მოხდა თუ არა მათთან
კომუნიკაცია, საჭიროების შემთხვევაში თუ გაიარეს გასაუბრება / ტესტირება. შერჩევის ეტაპები ავტომატიზირებულია პროგრამის მიერ.

HR hub: რამდენად უზრუნველყოფს პროგრამა ინფორმაციის კონფიდენციალურობას?

პროგრამა დაფუძნებულია Cloud პრინციპზე, კერძოდ SaaS (Software as a Service) მიდგომით. ნებისმიერი ინფორმაცია ინახება დღესდღეობით ყველაზე პოპულალურ “Amazon”-ის დაცულ სერვერებზე და ჩვენთან გაფორმებული ხელშეკრულების საფუძველზე, თავის მხრივ ისიც იღებს პასუხისმგებლობას, რომ უზრუნველყოფილი იყოს ინფორმაციის კონფიდენციალურობა. ასევე ყველა კომპანიისთვის არის გამოყოფილი ცალკე მონაცემთა ბაზები და ერთმანეთის ინფორმაციასთან წვდომა ფიზიკურად არ აქვთ. გარდა ამისა, ჩვენი პროდუქტის მომხმარებლებთან ვაფორმებთ ხელშეკრულებას ინფორმაციის კონფიდენციალურობასთან დაკავშირებით.

HR hub: რა არის საჭირო თქვენი პროდუქტით სარგებლობისთვის?
პირველ ეტაპზე კომპანიისთვის ვატარებთ გაცნობითი ხასიათის ინდივიდუალურ პრეზენტაციას, როგორც დისტანციურად, ასევე, კომპანიებისთვის ხელსაყრელ ადგილზე ვიზიტით (მომხმარებლის სურვილის გათვალისწინებით ) სადაც, დეტალურად გავივლით პროგრამის შესაძლებლობებს, განვიხილავთ, თუ როგორ შეიძლება გამოიყენონ ეს რესურსი თავიანთ საქმიანობაში. შემდგომ ვაძლევთ 2 კვირიან უფასო წვდომას პროგრამაზე, რა დროსაც მათ აქვთ შესაძლებლობა განიხილონ ყველა ის მოდიფიკაცია (ცვლილებები, ახალი ფუნქციონალი და ა.შ.), რაც შესაძლოა დაჭირდეთ თავიანთი კომპანიის ბიზნეს პროცესების სპეციფიურობიდან გამომდინარე. აღნიშნულ პერიოდში გამოთქმულ ცვლილებებსა თუ მორგებას ჩვენი გუნდი გაუწევს სრულიად უსასყიდლოდ. 2 კვირიანი დემოს შემდგომ უკვე შესაძლებლობა აქვთ დაიწყონ პროგრამის სრულყოფილად გამოყენება.

HR hub: თუ შეგიძლიათ სერვისის ღირებულებაზეც რომ გვესაუბროთ.

Linton Group-ის პროდუქტის ყოველთვიური გადასახადის სიდიდე განპირობებულია მთელი რიგი უპირატესობებით სხვა მსგავსი ტიპის პროგრამებისგან. პროგრამა შექმნილია მოდულარული სისტემით და დაყოფილია პაკეტებად, რომელთა ღირებულება დამოკიდებულია პროდუქტის მომხმარებლის მიერ ამორჩეულ ფუნქციონალზე. უნდა აღინიშნოს, რომ პროგრამას არ სჭირდება ჩვენი მომხმარებლის მხრიდან არანაირი ინსტალაცია ან სერვერული ინფრასტრუქტურა. ამ ნაწილს ჩვენი გუნდი იღებს თავის თავზე და ეს ყველაფერი კომპანიებს ეძლევათ უსასყიდლოდ. პროგრამით სარგებლობისთვის მომხმარებელი იხდის მხოლოდ ყოველ თვიურ გადასახადს.

HR hub: რას გვეტყვით თქვენი გუნდის შესახებ?
კომპანიას ჰყავს ორი დამფუძნებელი: უჩა ოთინაშვილი და ნანი კობახიძე. ორივეს გვაქვს მრავალწლიანი გამოცდილება, როგორც ადამიანური კაპიტალის, ბიზნესის მართვისა და ადმინისტრირების მიმართულებით, ასევე ინფორმაციული ტექნოლოგიების პროცესების მართვის კუთხით. უჩას გამოცდილება ძირითადად არის IT მიმართულებით, ბოლო წლებში მუშაობდა პროგრამული უზრუნველყოფის შემუშავების წამყვან ამერიკულ კომპანიაში და სწორედ ამ კომპანიაში მიღებული ცოდნა და მათი მოდელი გადმოვიტანეთ ჩვენი პროდუქტების შემუშავებაში. გარდა ამისა მას აქვს მრავალწლიანი გამოცდილება კერძო თუ სახელმწიფო სტრუქტურებში მუშაობის.
ხოლო ჩემი გამოცდილება დაკავშირებულია უფრო მეტად ადამიანური კაპიტალის მართვასა და ადმინისტრირებასთან. ამ მიმართულებით ვმუშაობდი სხვადასხვა ორგანიზაციებში, მათ შორის წამყვან პოზიციებზე. პარალელურად უკვე რამდენიმე წელია ვეწევი საგანმანათლებლო საქმიანობას, ვარ ლექტორი სხვადასხვა სოციალური დარგის მიმართულებით.
უდიდეს მნიშვნელობას ვანიჭებთ კორპორაციულ კულტურას, მთავარ ფასეულობად მაღალი პროფესიონალიზმი მიგვაჩნია, მიზნის მისაღწევად ჩვენს გუნდს ვაკომპლექტებთ კვალიფიციური ადამიანური კაპიტალით, რომლის მიზანია შექმნას ეფექტური და საიმედო მომხმარებელზე ორიენტირებული პროდუქტი და სერვისები. ჩვენ გუნდს, რომელზედაც ცალსახად არის დამოკიდებული კომპანიის განვითარება და წარმატებები ახასიათებს სწრაფვა ეფექტური მუშაობისკენ და კორპორაციული ფასეულობებისადმი ერთგულება.
პერიოდულად ვთანამშრომლობთ დარგის ექსპერტებთან, როგორიცაა მაგალითად თამარ შუკაკიძე, რომელმაც უდიდესი როლი ითამაშა პროდუქტის შექმნაში. ასევე, გვყავს სოლიდური ადგილობრივი თუ საერთაშორისო პარტნიორები, რომლებიც გამოირჩევნიან მაღალი საზოგადოებრივი ნდობით, ვხელმძღვანელობთ საერთაშორისო დონეზე აღიარებული და დანერგილი სტანდარტებით.

ეფექტური HR მენეჯერის 7 დამახასიათებელი თვისება

არნახული სისწრაფით განვითარებად ბიზნეს სამყაროში, HR სფეროს როლი და ფუნქცია კომპანიის საქმიანობაში მუდმივად იცვლება. Continue reading “ეფექტური HR მენეჯერის 7 დამახასიათებელი თვისება”

ფილიპ მორის საქართველოს ორგანიზაციული ტრანსფორმაცია COVID-19-ის საპასუხოდ

კორონავირუსის პანდემიამ კომპანიებში დააჩქარა ორგანიზაციული ტრანსფორმაციის პროცესი, გამოიწვია თანამშრომლებთან ონლაინ ინტერაქცია და ახალ საოპერაციო მოდელებზე გადასვლა. Continue reading “ფილიპ მორის საქართველოს ორგანიზაციული ტრანსფორმაცია COVID-19-ის საპასუხოდ”

გახდი საერთაშორისო მასშტაბით აღიარებული SPHRi-ის პროფესიული ტიტულის მფლობელი

25 მაისიდან, BDO Academy-ში მსოფლიოში HR-ის კუთხით ლიდერი ორგანიზაციის  HRCI-ის მიერ შექმნილი SPHRi-ის სერტიფიცირების მოსამზადებელი კურსი იწყება. Continue reading “გახდი საერთაშორისო მასშტაბით აღიარებული SPHRi-ის პროფესიული ტიტულის მფლობელი”

აღმოაჩინე საკუთარი თავი – გაიარე სტაჟირება „ფილიპ მორის საქართველოში“

„ფილიპ მორის საქართველო“ ექვსთვიან სტაჟირების პროგრამას აცხადებს. „ფილიპ მორისი“ მსოფლიოს ერთ-ერთი წამყვანი თამბაქოს კომპანიაა, რომელიც 2019 წლიდან საქართველოში „საუკეთესო დამსაქმებლის“ ტიტულით სარგებლობს.

სტაჟირების პროგრამა სტუდენტებისა და კურსდამთავრებულებისთვის არის განკუთვნილი. „ფოლიპ მორის საქართველოს“ მიერ გაკეთებული განცხადების თანახმად, ინტერნებს შესაძლებლობა ექნებათ, განივითარონ პროფესიული უნარ-ჩვევები და მიიღონ სამუშაო გამოცდილება ისეთ სფეროში, როგორიც არის:  გაყიდვები, ფინანსები, HR, ადმინისტრაცია და შესყიდვები.

„ფილიპ მორის საქართველოს“ სტაჟირების პროგრამა არაერთმა სტუდენტმა გაიარა.  პროგრამის წარმატებით დასრულების შემდეგ კი რამდენიმე მათგანი კომპანიის გუნდის წევრიც გახდა. ისინი თავის გამოცდილებას გვიზირებენ და „ფილიპ მორის საქართველოს“ სტაჟირების პროგრამაზე გვესაუბრებიან.

როგორც თორნიკე მათითაშვილი გვიყვება, „ფილიპ მორის საქართველოს“ სტაჟირება მისთვის პირველი სამსახურეობრივი გამოცდილება იყო. თუმცა, ეს ის ადგილი აღმოჩნდა, სადაც პირველივე დღიდან იგრძნობოდა მეგობრული და ჯანსაღი სამუშაო გარემო, რომელიც შესაძლებლობას აძლევდა მას, გამოევლინა საკუთარი თავი და შესაძლებლობები.

„ფილიპ მორისში გავლილი სტაჟირების პერიოდში გავიგე, რა არის გუნდური მუშაობა, ლიდერშიფი და ის, თუ რამდენად დიდი გავლენა აქვს მოტივაციაზე  სამსახურის მიერ მონიჭებულ შესაძლებლობას, განახორციელო საკუთარი იდეები და დამოუკიდებლად მიიღო გადაწყვეტილებები“, – გვიყვება თორნიკე მათითაშვილი.

ნიკოლოზ მიქაძე სამი წელია რაც „ფილიპ მორის საქართველოს“ ფინანსების დეპარტამენტში მუშაობს. მან სტაჟირების პროგრამა სტუდენტობის პერიოდში გაიარა და შეიძინა ის გამოცდილება, რომელმაც მისი პროფესიული ზრდა განაპირობა.

 „მუშაობდე წარმატებულ და გამოცდილ ადამიანებთან, დიდი გამოწვევაა. ეს გაძლევს შესაძლებლობას, შეიძინო სხვადასხვა სახის ცოდნა მათთან საქმიანი ურთიერთობით. „ფილიპ მორის საქართველო“ არის კომპანია, რომელიც ყოველთვის ახალ გამოწვევას გვთავაზობს და ამ გამოწვევების დახმარებით გვაძლევს პროფესიული განვითარების შესაძლებლობას. გვიბიძგებს იმისკენ, რომ მოვიპოვოთ მეტი თავდაჯერებულობა. ახლა მე მჯერა, რომ ნებისმიერი გამოწვევა არის ახალი შესაძლებლობა და არა – ბარიერი“, საკუთარ გამოცდილებას გვიზიარებს ნიკოლოზ მიქაძე.

შოთა შანავა კი გვიყვება, რომ „ფილიპ მორის საქართველო“ იყო ის კომპანიაა, რომელიც მას საკუთარი თავის აღმოჩენაში დაეხმარა. როგორც თავად იხსენებს, მესამე კურსზე მან ფინანსების მიმართულება აირჩია, თუმცა ყოველთვის ფიქრობდა, რომ ეს ის არ იყო, რისი კეთებაც ცხოვრებაში უნდოდა.

„ფილიპ მორისში გასაუბრებაზე მკითხეს, სად ვხედავდი საკუთარ თავს… დაახლოებით ორსაათიანი ინტერაქციული გასაუბრების შემდეგ მივხვდი, რომ არ მსურდა ფინანსების სფეროში მუშაობა და ციფრების ტყვეობაში ყოფნას ადამიანებთან კომუნიკაცია მერჩივნა. ასე გავხდი გაყიდვების ინტერნი და თავდაუზოგავი შრომის შემდეგ „ფილიპ მორის“ გუნდის წევრობა და რეგიონში გაყიდვების კუთხით სიტუაციის კონტროლი შემომთავაზეს. მალევე შევუერთდი თბილისის გუნდს და დღეს შემიძლია ვთქვა, რომ ფილიპ მორისის დახმარებით აღმოვაჩინე „საკუთარი მე“.

„ფილიპ მორის საქართველო“ არის კომპანია, რომელიც ახალგაზრდებს საკუთარი თავის აღმოჩენის, საკუთარი შესაძლებლობების გამოვლენისა და პროფესიული განვითარების შესაძლებლობას სთავაზობს. პროფესიონალებისგან შემდგარი გუნდი მაღალი ორგანიზაციული კულტურით გამოირჩევა, რაც კომპანიაში მიღებულ გამოცდილებას კიდევ უფრო მეტად ღირებულად აქცევს.

თუ გსურთ, რომ მოხვდეთ „ფილიპ მორის საქართველოს“ სტაჟირების პროგრამაში და მიიღოთ ერთ-ერთი საუკეთესო სამუშაო გამოცდილება, გაიარეთ რეგისტრაცია. აპლიკაციის მიღება 30 მაისამდე გაგრძელდება.

ქოუჩინგის საერთაშორისო კვირეულის ფარგლებში ღონისძიება ,,ქოუჩინგი:ინსპირაციის წყარო” გაიმართება

ქოუჩინგის საერთაშორისო ფედერაციის (ICF) საქართველოს წარმომადგენლობა ქოუჩინგის საერთაშორისო კვირეულის ფარგლებში ინოვაციურ და კრეატიულ ღონისძიებას ,,ქოუჩინგი: ინსპირაციის წყარო“ მართავს.

ღონისძიებაზე თქვენ:

  • გაიცნობთ ICF საქართველოს წევრ ქოუჩებს, რომელთაგანაც მოისმენთ, თუ რა შეცვალა ქოუჩინგმა მათ ცხოვრებაში;
  • შემთხვევითი გადანაწილების პრინციპით მოხვდებით ერთ-ერთ ქოუჩთან, ისაუბრებთ სხვადასხვა მნიშვნელოვან თემებზე და დასვამთ შეკითხვებს, რომლებზეც მიიღებთ ამომწურავ პასუხებს. მსგავსი პრინციპით თქვენ სამ სხვადასხვა ჯგუფში აღმოჩნდებით, რაც შესაძლებლობას მოგცემთ მიიღოთ მრავალფეროვანი გამოცდილება და შთაგონება სხვადასხვა ქოუჩებისგან.

ღონისძიებასთან დაკავშირებით დეტალური ინფორმაცია იხილეთ აქ.

კვირეულის ფარგლებში ასევე ჩატარდება უფასო ქოუჩ-სესიები, რომლებზეც რეგისტრაცია დაიწყება 6 მაისს ICF საქართველოს ფეისბუქ გვერდზე: https://www.facebook.com/ICFweek/

ღონისძიება ტარდება ქოუჩინგის საერთაშორისო კვირეულის ფარგლებში, რომელიც მსოფლიოს მასშტაბით 70 ქვეყანაში აღინიშნება. საქართველოში ქოუჩინგის საერთაშორისო კვირეული 2019 წელს ჩატარდა, რომლის ბენეფიციარიც 1200 ადამიანი იყო.

დაამუღამე იზოლაცია ანუ  ჩახტი Flow-ში – ლიკა ნოზაძის ბლოგი

როცა გარეთ თბილი აპრილია და შენ ასრულებ მოწოდებებს #დარჩისახლში;

როცა ექსტრავერტი ხარ და ადამიანებთან ურთიერთობა გენატრება;

როცა ცხოვრება ქცევების შეცვლას გთხოვს;

როცა ზუსტად იცი, რომ ესეც გაივლის და საბოლოოდ პოზიტიურ გამოცდილებად დაგრჩება…

იღებ ლეპტოპს და იწყებ იმის გაკეთებას, რასაც აქამდე არ აკეთებდი.

დღეს, ბევრი კომპანიის ეიჩარი თავისი შესაძლებლობის მაქსიმუმს აკეთებს, რომ თანამშრომლებზე იზრუნოს, ზოგი ეიჩარი შეუძლებელს აკეთებს და ყველას მაქსიმალურად უნარჩუნებს სამსახურებს, კარგ განწყობას, დაფასებულობის განცდას.

ჩვენ Talent Flow-ს ტალანტების სკაუტებმა (ასე ჰქვია HR ბიზნეს პარტნიორებს ჩვენთან) გადავწყვიტეთ, დაგვეწყო კამპანია: „შენ ზრუნავ შენს თანამშრომელზე, ვინ ზრუნავს შენზე?“ ჩვენვე გადავწყვიტეთ ჩვენიანებზე ზრუნვა საკუთარ თავზე აგვეღო და იდეებიც წამოვიდა.

პირველი ივენთი იყო მონატრებული ერთმანეთის მოკითხვა და დანახვა.

მერე დაიწყო #hrchallenges, რომლის მიზანიცაა პოზიტიურ განწყობასთან ერთად ერთმანეთს კარგი გამოცდილებები გავუზიაროთ.

პირველი #hrchallenge სწორედ თვითიზოლაციაში დამუღამებული უნარების თუ ქცევების გაზიარებას დაეთმო. დანარჩენ ჩელენჯებს პერიოდულად გავაჟღერებთ. მთავარი მუღამი ამ ამბავში არის ორი რამე: შევინარჩუნოთ პოზიტიური განწყობა და გავუზიაროთ ერთმანეთს რაც შეიძლება მეტი პოზიტივი – გამოცდილება, ქცევა, უნარი, ჩვევა, ხასიათი. სულ 4 ჩელენჯი გვექნება და აუცილებლად გამოვავლენთ, თითოეულის ბოლოს, გამარჯვებულებს – FLOW Stars, რომლებიც საჩუქრად მიიღებენ ჩვენი კომპანიის სერვისებიდან, მათთვის სასურველ ნებისმიერ მომსახურებას, უფასოდ. ასევე გვეყოლება Flow Super Star – ყველაზე აქტიური, ყველაზე პოზიტიური მონაწილე, რომელიც ჩვენი თიმისგან სუპერ პრიზს მიიღებს საჩუქრად. სუპერ პრიზს გამარჯვებულთან ერთად გამოვაცხადებთ.

ჩელენჯების გარდა გვაქვს და გვექნება ონლაინ ივენთები, სადაც სხვადასხვა საინტერესო თემაზე ვისაუბრებთ ჩვენს კოლეგა ეიჩარებთან და არა მარტო ეიჩარებთან ერთად. 14 აპრილს სუპერ კოლეგებთან ერთად გვქონდა #hrspeakups, სადაც განვიხილეთ რატომ არის „ცუდი“ ეიჩარობა. ონლაინ ივენთები ლაივ სტრიმით გადის ჩვენს Facebook გვერდზე – Talent Flow და მისი მოსმენის, ყურების შესაძლებლობა აბსოლუტურად ყველა მსურველს აქვს. რაც მთავარია, ეს ყველაფერი სრულიად უფასოა, რადგან ჩვენი მიზანია რაც შეიძლება მეტ ადამიანზე ვიზრუნოთ და რაც შეიძლება მეტი პოზიტივი გავაზიაროთ.

ხოდა, მეგობრებო, ეიჩარებო, არაეიჩარებო, ნაცნობებო თუ უცნობებო, თუ გინდათ რომ ამ იზოლაციის პერიოდში კარგი რაღაცეები დაამუღამოთ და Flow-ში ჩახტეთ, გელით ამ კარგ ამბებში ზოგს მონაწილეებად, ზოგს მსმენელებად, ზოგს ლუპით მაყურებლებად – ჩვენ ყველა გაგვეხარდებით.

რა არის Flow და რატომ უნდა გინდოდეთ Flow-ში ჩახტომა? გარდა იმის, რომ Flow პოზიტიური ფსიქოლოგიის ცნებაა და მას თანამედროვე ლიდერები საუკეთესოდ იყენებენ საკუთარი და გუნდის წარმატებისთვის, ჩვენს ენაზე Flow არის  მუღამში ჩავარდნა, რომლის დროსაც ისეთი გატაცებული ხარ ამ მუღამებით დროის გასვლას ვერც კი ამჩნევ, ხოდა ჩვენ ვფიქრობთ, რომ ზუსტად ეს გვჭირდება ახლა ყველას – May Flow be with us!