ნებისმიერი პროფესიის ადამიანისთვის, ჯანმრთელობა ყველაზე მნიშვნელოვანი საზრუნავია. ამიერიდან შემოგთავაზებთ ახალ რუბრიკას ,,ჯანმრთელობა”, სადაც გაგიზიარებთ საჭირო რჩევებს, მედიკამენტების შესახებ ინფორმაციებს და ვისაუბრებთ სტრესზე, რომელიც დიდი დოზით არის ჩვენს ცხოვრებაში.
რუბრიკას დავიწყებთ ალერგიის საწინააღმდეგო ცნობილ მედიკამენტზე საუბრით, ვინაიდან ალერგია ბევრ ადამიანს აწუხებს და ეს მათ პროდუქტიულ მუშაობაშიც ხელს უშლის.
ალერგიის საწინააღმდეგო ცნობილი მედიკამენტი — საინტერესო ფაქტები კეტოტიფენის შესახებ
კეტოტიფენი ანტიჰისტამინური საშუალებაა. მოხმარება რეკომენდებულია ალერგიული მდგომარეობების სიმპტომური მკურნალობისას, ალერგიული რინიტისა (ცხვირის ლორწოვანი გარსის ანთება) და კონიუნქტივიტის (თვალის შემაერთებელი გარსის ანთება) წინააღმდეგ.
აშშ-ის ჯანდაცვის ეროვნული ინსტიტუტის თანახმად, კეტოტიფენი 1970 წელს შეიქმნა შვეიცარიაში. მისი პირველი მწარმოებელი კომპანია Sandoz Pharmaceuticals იყო და პირვანდელი დანიშნულება ანაფილაქსიური რეაქციების საწინააღმდეგო მოქმედება გახდლათ.
აშშ-ში კეტოტიფენი ამჟამად ოფთალმოლოგიაში გამოიყენება და ურეცეპტოდ გაიცემა თვალის ალერგიული რეაქციების, ქავილის დროს. კანადაში მისი შეძენა მხოლოდ რეცეპტითაა შესაძლებელი და ატოპიური ასთმის წინააღმდეგ გამოიყენება.
მექსიკასა და ევროპულს ქვეყნებში კეტოტიფენს დაახლოებით იმ დანიშნულებით იყენებენ, როგორითაც ქართულ საზოგადოებაში — სხვადასხვა ალერგიული რეაქციის სამკურნალოდ, იქნება ეს ჭინჭრის ციება (ურტიკარია), კვებითი ალერგიები თუ სხვა.
მედიკამენტი გვხვდება როგორც ტაბლეტების, ისე სუსპენზიის, ანუ სიროფის სახით.
კეტოტიფენის ტაბლეტი, ისევე, როგორც კეტოტიფენის სიროფი, ურეცეპტოდ გაიცემა. მიუხედავად ამისა, მნიშვნელოვანია, რომ მიღებამდე ექიმთან გავიაროთ კონსულტაცია.
კეტოტიფენი ასთმიანი პაციენტებისთვის
წამალი ასთმის მქონე პაციენტებშიც გამოიყენება. თუმცა, უნდა გვახსოვდეს, რომ აქტიური შეტევის დროს ნაკლებად ეფექტიანია. სწორედ ამიტომ, კეტოტიფენს პრევენციის მიზნით უფრო იყენებენ. ასთმის საწინააღმდეგო სხვა წამლებთან მოქმედებით კეტოტიფენი ამსუბუქებს დაავადების მიმდინარეობას, სიმპტომებსა და სიმძიმეს.
მისი გამოყენება, უმეტესწილად, სუსტად გამოხატული ატოპიური (ალერგიული) ბრონქული ასთმის ხანგრძლივი მკურნალობისას არის რეკომენდებული.
კეტოტიფენის ურთიერთქმედება სხვა წამლებთან
ამ მედიკამენტის გამოყენება სხვა წამლებთან ერთად საკმაოდ გავრცელებული პრაქტიკაა, თუმცა ეს არ ნიშნავს, რომ ნებისმიერ წამალთან შეიძლება მისი მიღება. თუკი რომელიმე პრეპარატს ან პრეპარატებს უკვე იღებთ, კეტოტიფენის დალევამდე აუცილებლად გაიარეთ კონსულტაცია ექიმთან ან ფარმაცევტთან — შეიძლება წამლების ერთად მიღება რეკომენდებული არ იყოს.
ერთ-ერთი ყველაზე გავრცელებული პრაქტიკა კეტოტიფენისა და ნოშპას ერთად მიღებაა. ერთი მხრივ, სპაზმის საწინააღმდეგო წამალი და მეორეს მხრივ, ანტიალერგიული მოქმედების პრეპარატი ხშირად გამოიყენება სპაზმურ-ალერგიული ხველის დროს.
თუმცა, ორი განსხვავებული მოქმედების პრეპარატის ერთად მიღებამდე უნდა გავითვალისწინოთ სხვადასხვა გარემოება. მაგალითად, როგორ ურთიერთქმედებს ამ წამლების შემადგენელი აქტიური ნივთიერებები ერთმანეთთან, უნდა გამოვრიცხოთ მათი ურთიერთქმედებით გამოწვეული ალერგიული რეაქციები. სწორედ ამიტომ რეკომენდებულია, რომ მედიკამენტების მიღებამდე სპეციალისტთან გავიაროთ კონსულტაცია.
მსოფლიოს ერთ-ერთ წამყვან კლინიკად აღიარებული მაიოს ჰოსპიტალის სპეციალისტები გვირჩევენ, რომ კეტოტიფენი არ გამოვიყენოთ შემდეგ მედიკამენტებთან:
- ამიფამპრიდინი;
- ბუპროპიონი;
- დონეპეზილი;
- პიტოლისანტი.
ცხადია, ამ შემთხვევაში იგულისხმება ისიც, რომ კეტოტიფენის გამოყენება არ შეიძლება ზემოხსენებული მედიკამენტების მთავარ, აქტიურ ნივთიერებასთან ერთად. ამიტომაც, წამლის დასახელების გარდა უნდა დავაკვირდეთ შედგენილობებსაც.
კეტოტიფენის ურთიერთქმედება საკვებთან და სასმელთან
კეტოტიფენი ალერგიის წინააღმდეგ მუშაობს, სწორედ ამიტომ, მის დანიშვნასთან ერთად უმჯობესი იქნება, ჩვენს ექიმს კვების რაციონზეც დავუსვათ კითხვა.
გამომდინარე იქიდან, რომ მკურნალობა ინდივიდუალური პროცესია და ყველასთვის ერთნაირად არ მიმდინარეობს, შესაძლოა, კონკრეტული საკვებისა თუ სასმელის რაციონიდან ამოღება დაგვჭირდეს — ამაზე კი გადაწყვეტილება ექიმმა უნდა მიიღოს.
ერთადერთი, რაც დანამდვილებით უნდა გამოვრიცხოთ ანტიალერგიული მკურნალობის, მათ შორის, კეტოტიფენის მიღების დროსაც, ალკოჰოლია. თუკი ასთმისა და ხველის საწინააღმდეგო მკურნალობას გადიხართ — თამბაქო და სხვა მსგავსი მოხმარების პროდუქტიც უნდა ამოიღოთ ყოველდღიურობიდან.
